ໄຂຂໍ້ສົງໄສ ກໍລະນີເມືອງກາສີຈູດທຳລາຍໄມ້ທີ່ຄົນລັກລອບຕັດຢູ່ປ່າ

    0
    165

    ຖືເປັນອີກໜຶ່ງຂ່າວດັງໃນສື່ສັງຄົມອອນລາຍ ພາຍຫຼັງທີ່ຫ້ອງການຖະແຫຼງຂ່າວເມືອງໄດ້ລາຍງານຂ່າວກ່ຽວກັບການຈູດທຳລາຍໄມ້ທີ່ພາກສ່ວນກ່ຽວຂ້ອງໄປພົບເຫັນຢູ່ປ່າ ຊາວເນັດຕ່າງກໍ່ວິຈານໄປໃນຫຼາຍແງ່ ບາງກໍ່ວ່າຄືບໍເອົາມາເພື່ອປະມູນຂາຍເອົາເງິນເຂົ້າລັດ, ບາງກໍວ່າຄືບໍເອົາມາເພື່ອໝູນໃຊ້ໃນວຽກໍ່ສ້າງຕ່າງໆໂຮງຮຽນວັດວາຕ່າງໆ ມື້ນີ້ເຮົາມາເບິ່ງຄຳຕອບຈາກທາງເມືອງກາສີກ່ຽວກັບເລື່ອງນີ້.

    ການຈູດທຳລາຍໄມ້ທີ່ພົບເຫັນຊຸກເຊື່ອງໄວ້ຢູ່ປ່າເຂດປ້ອມຍາມພູບວກຊ້າງ ບ້ານໜອງສານ ມີຂຶ້ນໃນວັນທີ 27 ສິງຫາ 2021 ນີ້ ເປັນປະເພດໄມ້ຂຽງ ( ໄມ້ກະດອມ) ເຊີ່ງມີທັງໝົດ 170 ບ້ອມ ໃນນີ້ໄດ້ຍຶດໄວ້ຢູ່ຫ້ອງວ່າການເມືອງ ຈຳນວນ 94 ບ້ອມ ໃນສ່ວນນີ້ແມ່ນທາງເມືອງເຫັນດີໃຫ້ປະມູນຂາຍເພື່ອນຳເງິນເຂົ້າງົບປະມານຂອງລັດ.

    ແຕ່ສຳລັບໄມ້ທີ່ຍັງໄວ້ຢູ່ປ່າ ຈຳນວນ 76 ບ້ອມ ແມ່ນເຫັນດີໃຫ້ທຳລາຍຖີ້ມຢູ່ກັບທີ່ ເຂົ້າຮ່ວມຈູດທຳລາຍໄມ້ໃນຄັ້ງນີ້ມີ ທ່ານ ແພງຄຳ ຈັນທະມຸງຄຸນ ຮອງເລຂາພັກເມືອງ ປະທານກວດກາພັກ-ລັດເມືອງ ທັງເປັນສະມາຊິກສະພາປະຊາຊົນແຂວງວຽງຈັນ ປະຈຳເມືອງກາສີ, ມີ ທ່ານ ບຸນທ່ຽງ ວິລະພົນ ຫົວໜ້າຫ້ອງການກະສິກຳ ແລະ ປ່າໄມ້ເມືອງກາສີ, ມີເຈົ້າໜ້າທີ່ປ່າໄມ້ ພ້ອມດ້ວຍພະນັກງານຫ້ອງການທີ່ກ່ຽວຂ້ອງ ພາຍໃນເມືອງເຂົ້າຮ່ວມຢ່າງພ້ອມພຽງ.


    ຕໍ່ກັບເຫດການດັ່ງກ່າວກໍ່ໄດ້ມີກະແສຈາກສັງຄົມທີ່ຫຼາກຫຼາຍມຸມມອງ ເຊິ່ງມີຄົນຈຳນວນບໍ່ນ້ອຍທີ່ສະແດງຄວາມຄິດເຫັນກ່ຽວກັບການທຳລາຍໄມ້ໃນຈຳນວນດັ່ງກ່າວນັ້ນ ທີ່ມີໃຈຄວາມປະມານວ່າ ແທນທີ່ຈະນຳເຂົ້າມາເປັນສິ່ງທີ່ເປັນປະໂຫຍດໃຫ້ກັບພັກ-ລັດ ແຕ່ກົງກັນຂ້າມທຳລາຍຖິ້ມເສຍລ້າ.


    ດັ່ງນັ້ນ, ໃນເວລາ 15:00ໂມງ ຂອງວັນທີ 31 ສິງຫາ 2021 ທ່ານ ບຸນທ່ຽງ ວິລະພົນ ຫົວໜ້າຫ້ອງການກະສິກຳ ແລະ ປ່າໄມ້ເມືອງກາສີ ຕາງໜ້າໃຫ້ຄະນະສະເພາະກິດຂອງເມືອງ ກໍ່ໄດ້ອະທິບາຍຊີ້ແຈງເຖິງເຫດຜົນ ຂອງການຈູດທຳລາຍໄມ້ຂຽງ (ປະເພດໄມ້ກະດອມ) ຈຳນວນ 76 ບ້ອມ ໃນຄັ້ງວັນທີ 27 ສິງຫາ 2021 ທີ່ທາງຄະນະສະພາະກິດເມືອງໄດ້ຢືດໄວ້ຢູ່ປ່າ ເຂດປ້ອມຍາມພູບວກຊ້າງ ບ້ານໜອງສານ ເມືອງກາສີ ແຂວງວຽງຈັນ.


    ທ່ານ ບຸນທ່ຽງ ວິລະພົນ ກ່າວວ່າ: ເຫດຜົນທີ່ຈຳເປັນຕ້ອງໄດ້ຈູດທຳໄມ້ກັບທີ່ແມ່ນຍ້ອນສາມເຫດຜົນຫຼັກ ຄື:
    1). ໄມ້ດັ່ງກ່າວແມ່ນຢູ່ຫ່າງໄກ ເສັ້ນທາງເຂົ້າເຖິງມີຄວາມຫຍຸ້ງຍາກຫຼາຍ ຖ້າຈະທະລຸເສັ້ນທາງເຂົ້າຫາອາດ ຈະເປັນຊ່ອງວ່າງ ໃຫ້ແກ່ກຸ່ມຄົນທີ່ບໍ່ຫວັງດີເຂົ້າໄປລັກລອບຕັດໄມ້ຢູ່ເຂດດັ່ງກ່າວເພີ່ມອີກ.
    2). ຖ້າຈະນຳເອົາໄມ້ດັ່ງກ່າວມາເມືອງແມ່ນຈຳຕ້ອງໄດ້ໃຊ້ງົບປະມານຈຳນວນຫຼາຍເຊິ່ງໄລ່ລຽງແລ້ວບໍ່ຄຸ້ມຄ່າ.
    3). ຖ້າຈະປະໃຫ້ມັນເປື່ອຍເນົ່າຢູ່ປ່າອາດເປັນຊ່ອງວ່າງໃຫ້ກຸ່ມຄົນບໍ່ຫວັງດີເຂົ້າໄປເຄື່ອນຍ້າຍໄມ້ຂຽງຈຳນວນດັ່ງກ່າວນຳເອົາໄປຂາຍ ເຊິ່ງຈະເປັນການສົ່ງເສີມໃຫ້ເຂົາເຈົ້າ ສືບຕໍ່ລັກລອບຕັດໄມ້ເພີ່ມອີກກໍ່ອາດເປັນໄປໄດ້.

    ດັ່ງນັ້ນ, ຜ່ານການປຶກສາຫາລືແລ້ວຈິ່ງເຫັນວ່າຕ້ອງຈູດທຳລາຍຖີ້ມ ເພື່ອເປັນການຕັດບັນຫາທັງໝົດ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.