ພາຣາແລມປິກ 2020 ເປີດສາກທາງການແລ້ວ, ແກ່ນ ເທບທິດາ ສະບັດທຸງຊາດລາວ ໃນພິທີເປີດ

    0
    20

    ມະຫະກໍາກີລາ ພາຣາແລມປິກ ຄັ້ງທີ 16 ມີພິທີເປີດການແຂ່ງຂັນຢ່າງເປັນທາງການ ໃນວັນທີ 24 ສິງຫາ 2021 ທີ່ນະຄອນຫຼວງໂຕກຽວ ປະເທດຍີ່ປຸ່ນ ພາຍໃຕ້ການຄວບຄຸມ ແລະ ປ້ອງກັນການແຜ່ລະບາດຂອງໂຄວິດ ເຊິ່ງອະນຸຍາດໃຫ້ຜູ້ຊົມເຂົ້າສະໜາມໄດ້ພຽງ 75 ຄົນເທົ່ານັ້ນ.

    ພິທີດັ່ງກ່າວມີສົມເດັດພະຈັກກະພັດ ນາຣຸຮິໂຕະ ໃຫ້ກຽດເປັນປະທານ ກ່າວເປີດງານການແຂ່ງຂັນຢ່າງເປັນທາງການ, ໂດຍມີ ທ່ານ ໂທມັສ ບາກ ປະທານຄະນະກໍາມະການໂອແລມປິກສາກົນ ( IOC ) ແລະ ທ່ານ ແອນດຣູວ ພາສັນ ປະທານຄະນະກໍາມະການພາຣາແລມປິກສາກົນ ( IPC ) ພ້ອມດ້ວຍແຂກທີ່ຖືກເຊີນ ເຂົ້າຮ່ວມເປັນສັກຂີພີຍານ.

    ການສະແດງໃນພິທີເປີດຄັ້ງນີ້ເຈົ້າພາບນໍາສະເໜີຮູບແບບການສະແດງເຖິງ “ ການກ້າວໄປຂ້າງໜ້າດ້ວຍກັນດ້ວຍປີກຂອງພວກເຮົາ ” ເປັນການສ້າງໃຫ້ນັກກີລາຄົນພິການ ພະຍາຍາມຈະກາງປີກບໍ່ວ່າມີລົມພັດໄປທາງໃດ ຕໍ່ດ້ວຍການສະແດງຂອງເຈົ້າພາບທີ່ເນັ້ນສື່ຄວາມໝາຍເຖິງການຈັບມືກັນຂອງຊາດ ສະມາຊິກພາຣາແລມປິກ ເກມ, ການໃຫ້ກຽດ ແລະ ຄວາມກ້າຫານຂອງນັກກີລາ ລວມເຖິງຄວາມສາມັກຄີກັນ ໂດຍໃຊ້ດົນຕີເປັນສື່ເຖິງສຽງຂອງຄວາມປອງກອງກັນເປັນຕົ້ນ.

    ຈາກນັ້ນກໍເຂົ້າສູ່ຂະບວນການສວນສະໜາມຂອງທັບນັກກີລາຈາກ 183 ປະເທດລົງສູ່ສະໜາມ ໂດຍທັບນັກກກີລາລາວ ຍ່າງເຂົ້າສູ່ສະໜາມເປັນລຳດັບທີ 152 ຕາມຕົວອັກສອນພາສາຢີ່ປຸ່ນ ຈາກ 162 ປະເທດ ເຊິ່ງແນ່ນອນ ທັບນັກກີລາລາວ ແມ່ນມອບໜ້າທີ່ຖືທຸງຊາດໃນພິທີດັ່ງກ່າວໃຫ້ກັບ ທ້າວ ແກ່ນ ເທບທິດາ ນັກກີລາແລ່ນ-ລານຄົນພິການລາວ ໜຶ່ງດຽວທີ່ໄດ້ເຂົ້າຮ່ວມ.

    ສໍາລັບ ແກ່ນ ເທບທິດາ ເກີດວັນທີ 29 ພະຈິກ 1999 ທີ່ບ້ານລາດບວກ ເມືອງແປກ ແຂວງຊຽງຂວາງ ສູງ 170 ຊັງຕີແມັດ ແລະ ນໍ້າໜັກ 64 ກິໂລແມັດ ມີສະຖິິຕິການແລ່ນທີ່ດີທີ່ສຸດແມ່ນ 11,34 ວິນາທີ ເຊິ່ງຜົນງານທີ່ຜ່ານມາແມ່ນເຂົ້າຮ່ວມການແຂ່ງຂັນລະດັບອາຊີ ຄວ້າອັນດັບ 5 ທັງປະເພດ 100 ແມັດ ແລະ 200 ແມັດ. ນອກນັ້ນ, ຍັງເຄີຍເຂົ້າຮ່ວມຊີງແຊັມໂລກຢູ່ທີ່ນະຄອນດູໄບ ແມ່ນໄດ້ອັນດັບທີ 13 ແລະ ກ່ອນໜ້ານີ້ແມ່ນເກັບຕົວຝຶກຊ້ອມຢູ່ທີ່ປະເທດຍີ່ປຸ່ນ ນັບແຕ່ວັນທີ 12 ສິງຫາ 2021, ຈະລົງແຂ່ງຂັນໃນວັນທີ 29 ສິງຫາ 2021.

    ແນ່ນອນວ່າຄັ້ງນີ້ເປັນຄັ້ງທໍາອິດຂອງ ແກ່ນ ທີ່ໄດ້ລົງແຂ່ງຂັນໃນພາຣາແລມປິກ ເຊິ່ງລາວກໍຕັ້ງເປົ້າຫວັງຍາດໄດ້ຫຼຽນໃດຫຼຽນໜຶ່ງ ລວມທັງຍັງກາຍເປັນນັກກີລາຄົນພິການລາວ ຄັ້ງທີ 5 ທີ່ໄດ້ເຂົ້າຮ່ວມ ພາຣາແລມປິກ ຕໍ່ຈາກປີ 2000, 2008, 2012 ແລະ 2016 ເຄີຍໄດ້ 1 ຫຼຽນທອງຈາກ ທ້າວ ເອື້ອຍ ສີມາຍ ນັກກີຍົກນໍ້າໜັກ ລຸ້ນ 48 ກິໂລ ໃນປີ 2008 ທີ່ປັກກິ່ງ ສປ ຈີນ.

    ນອກນັ້ນ, ໃນພິທີເປີດເຈົ້າພາບຍີ່ປຸ່ນ ສ້າງຄວາມຮືຮາດ້ວຍການເຊີນ ອາຄິຮິໂຕະ ໂຮຊິເດະ ນັກບິນອາວະກາດຊາວຍີ່ປຸ່ນ ຮ່ວມແລ່ນທວນໄຟເປີດການແຂ່ງຂັນ ຜ່ານລະບົບວີດີໂອຄອນເຟີເຣນຊ໌ ຈາກສະຖານີອະວະກາດນາໆຊາດຍີ່ປຸ່ນ ໂດຍອາໄສເທັກໂນໂລຢີ່ຕ່າງໆ ທັງກ້ອງຄວາມຄົມຊັດສູງ ແລະ ລະບົບສົ່ງສັນຍານຄວາມລະອຽດສູງລະຫວ່າງສະຖານີອາວະກາດກັບໂລກ ເພື່ອໃຫ້ ໂຮຊິເດະ ສາມາດມາຮ່ວມແລ່ນທວນໄຟທ໌ໄດ້.

    ການແຂ່ງຂັນຄັ້ງນີ້ ມີນັກກີລາເຂົ້າຮ່ວມປະມານ 4.403 ຄົນ, ຍິງ 1.853 ຄົນ ຈາກ 162 ປະເທດ, ມີການຊີງໄຊ 539 ຫຼຽນຄຳ ຈາກ 22 ປະເພດກີລາ ເຊິ່ງເປັນການຊິງຫຼຽນຄຳຫຼາຍສຸດໃນປະຫວັດສາດ ພິເສດໃນການແຂ່ງຂັນຄັ້ງນີ້ມີ 2 ກີລາໃໝ່ບັນຈຸເຂົ້າແຂ່ງຂັນເຊັ່ນ: ດອກປີກໄກ່ ແລະ ເທຄວັນໂດ້.

    ຮູບຈາກ: AP

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.