ຄະນະສະເພາະກິດ​ ສັ່ງປິດການເຂົ້າ-ອອກ ຂອງປະຊາຊົນເມືອງສັງທອງ

    0
    122

    ຄະນະສະເພາະກິດ​ ສັ່ງປິດການເຂົ້າ-ອອກ ຂອງປະຊາຊົນເມືອງສັງທອງ ຍ້ອນຜູ້ຕິດເຊື້ອພະຍາດໂຄວິດ​ໃຫມ່​ ມີການພົວພັນກັບຄົນຈຳນວນຫຼາຍຄະນະສະເພາະກິດຕ້ານ, ສະກັດກັ້ນ, ຄວບຄຸມ ແລະ ແກ້ໄຂ ພະຍາດໂຄວິດ-19 ເມືອງສັງທອງ,​ ນະຄອນຫຼວງວຽງຈັນ ແຈ້ງມາຍັງບັນດາທ່ານຊາບວ່າ: ປະຈຸບັນນີ້ຢູ່ບ້ານ ສຳພັນນາ ເມືອງສັງທອງ ໄດ້ມີກໍລະນີຜູ້ຕິດເຊື້ອພະຍາດໂຄວິດ-19 ເຊິ່ງແມ່ນບຸກຄົນທີ່ເດີນທາງມາຈາກປະເທດໄທ ຜ່ານດ່ານສາກົນຂົວມິດຕະພາບ ລາວ-ໄທ ແຫ່ງທີ 1​ ແລະ ໄດ້ກັກໂຕຢູ່ສູນຫຼັກ 27 ນະຄອນຫຼວງວຽງຈັນ ພາຍຫຼັງຄົບຕາມກຳນົດ 14 ວັນແລ້ວ ໄດ້ອອກຈາກສູນ ໃນວັນທີ​ 21 ກໍລະກົດ 2021.

    ຕົກມາຮອດວັນທີ 24 ກໍລະກົດ 2021 ຜູ້ກ່ຽວມີອາການເຈັບຫົວ ແລະ ເປັນໄຂ້ ແຕ່ບໍ່ໄດ້ໄປກວດຫາເຊື້ອ, ມາຮອດວັນທີ 29 ກໍລະກົດ 2021 ຜູ້ກ່ຽວຈຶ່ງໄດ້ໄປກວດຫາເຊື້ອຢູ່ສູນຫ້ວຍຫົງ ແລະ ໄດ້ຮັບແຈ້ງຜົນກວດເປັນບວກ (ຕິດເຊື້ອ) ໂຄວິດ-19 ໃນວັນທີ 30 ກໍລະກົດ 2021.​ ດັ່ງນັ້ນ,​ ຄະນະສະເພາະກິດຂັ້ນເມືອງສັງທອງ ຈຶ່ງໄດ້ກຳນົດບ້ານ ສຳພັນນາ ແລະ ບ້ານແກ້ງໝໍ້ ເມືອງສັງທອງ ນະຄອນຫຼວງວຽງຈັນ ເປັນບ້ານເເດງ ພ້ອມທັງກຳນົດເມືອງສັງທອງ​ ເປັນເຂດທີ່ມີຄວາມສ່ຽງການແຜ່ລະບາດຂອງພະຍາດດັ່ງກ່າວ.​ ດັ່ງນັ້ນ ຈຶ່ງແຈ້ງມາຍັງທຸກພາກສ່ວນ ປະຕິບັດດັ່ງນີ້:

    1. ເອົາໃຈໃສ່ປະຕິບັດມາດຕະການທີ່ລະບຸໄວ້ໃນແຈ້ງການ ເລກທີ 18/ສພກ.ນວ, ລົງວັນທີ 20 ກໍລະກົດ 2021​ ກ່ຽວກັບການຈັດຕັ້ງປະຕິບັດ ຄຳສັ່ງວ່າດ້ວຍການເພີ່ມທະວີມາດຕະການປ້ອງກັນ, ຄວບຄຸມ, ສະກັດກັ້ນ ແລະ​ ແກ້ໄຂ ພະຍາດໂຄວິດ-19 ຢູ່ນະຄອນຫຼວງວຽງຈັນ ແລະ ນິຕິກາອື່ນໆຂອງສູນກາງ, ນະຄອນຫຼວງວຽງຈັນ,
    ເມືອງ ວາງອອກຢ່າງເຂັ້ມງວດ.2.​ ປິດການເຂົ້າ-ອອກ ຂອງປະຊາຊົນເມືອງສັງທອງ ທີ່ມີຄວາມສ່ຽງລະບາດພະຍາດໂຄວິດ-19 ນັບແຕ່ເວລາ 22:00​ ໂມງ ຂອງວັນທີ 30 ກໍລະກົດ 2021 ເປັນຕົ້ນໄປ ຈົນກວ່າຈະມີແຈ້ງການປ່ຽນແປງ, ກໍລະນີມີຄວາມຈຳເປັນເດີ່ນທາງເຂົ້າ-ອອກ ຕ້ອງໄດ້ຮັບອະນຸຍາດຈາກອົງການປົກຄອງບ້ານ, ເມືອງ ແລະ ນະຄອນຫຼວງວຽງຈັນ ແຕ່ຕ້ອງໄດ້ຮັບວັກຊິນຄົບ 2 ເຂັ້ມ; ສໍາລັບລົດບັນທຸກ, ລົດຂົນສົ່ງສິນຄ້າຈະໄປບໍລິການ ຈະຕ້ອງໄດ້ຮັບອະນຸຍາດຈາກຄະນະສະເພາະກິດຂັ້ນເມືອງ ແລະ ນະຄອນຫຼວງວຽງຈັນ ແຕ່ໂຊເຟີລົດຕ້ອງໄດ້ຮັບວັກຊິນຄົບ 2 ເຂັ້ມ.

    3. ປິດການເຂົ້າ-ອອກ ແລະ ການນຳໃຊ້ເຮືອຫາງຍາວ ຂອງປະຊາຊົນບ້ານສຳພັນນາ ແລະ ບ້ານແກ້ງໝໍ້ ເມືອງສັງທອງ ນັບແຕ່ເວລາ 22:00 ໂມງ ຂອງວັນທີ 30 ກໍລະກົດ 2021 ເປັນຕົ້ນໄປ ຈົນກວ່າຈະມີແຈ້ງການປ່ຽນແປງ; ໃຫ້ປະຊາຊົນພາຍໃນບ້ານຈຳກັດຕົນເອງພາຍໃນເຮືອນ; ສຳລັບການໄປທຳການຜະລິດ​ (ຢູ່ຂອບເຂດບ້ານຂອງຕົນ) ແລະ ກໍລະນີມີຄວາມຈຳເປັນຕ້ອງໄດ້ອອກໄປຊື້ເຄື່ອງອຸປະໂພກ-ບໍລິໂພກທີ່ຈຳເປັນ, ຊື້ຢາປົວພະຍາດ, ໄປໂຮງໝໍ ແມ່ນອະນຸຍາດຄອບຄົວລະ 1 ຄົນ ແຕ່ຕ້ອງໄດ້ຮັບອະນຸຍາດຈາກອົງການປົກຄອງບ້ານ ແລະ ຄະນະສະເພາະກິດຂັ້ນເມືອງ.​

    4. ໃຫ້ປິດຮ້ານອາຫານ, ສວນອາຫານ, ສະຖານທີ່ທ່ອງທ່ຽວ, ສັງວຽນໄກ່ຕີ, ຮ້ານສະນຸກເກີ້, ເດີ່ນກິລາ, ຮ້ານເສີມສວຍ, ຮ້ານຕັດຜົມ ຢູ່ພາຍໃນເມືອງສັງທອງ; ສຳລັບຮ້ານອາຫານ, ຮ້ານຂາຍເຄື່ອງຍົກ-ຂາຍຍ່ອຍ ທີ່ບໍ່ນອນໃນບ້ານແດງ ອະນຸຍາດໃຫ້ເປີດໄດ້ ແຕ່ຕ້ອງປະຕິບັດມາດຕະການປ້ອງກັນການຕິດເຊື້ອຢ່າງເຂັ້ມງວດ.​5. ຫ້າມຈັດກອງປະຊຸມໃນລະດັບຕ່າງໆ, ງານລ້ຽງສ້າງສັນ ຫຼື ຊຸມແຊວທຸກຮູບແບບ ຢູ່ທຸກສະຖານທີ່ໃນຂອບເຂດເມືອງສັງທອງ, ສ່ວນງານຊາປະນະກິດສົບ ໃຫ້ປະຕິບັດມາດຕະການປ້ອງກັນການຕິດເຊື້ອຢ່າງເຂັ້ມງວດ ແລະ ໃຫ້ໂຈະການຮຽນ-ການສອນ ທຸກຊັ້ນ, ທຸກສາຍ ລວມທັງການສອບເສັງຈົບຊັ້ນ ປ 5 ຈົນກວ່າຈະມີແຈ້ງການປ່ຽນແປງ.
    ສຳລັບບັນດາຫ້ອງການ, ຫົວໜ່ວຍທຸລະກິດ ໃຫ້ຜັດປ່ຽນກັນມາປະຈຳການແກ້ວຽກທີ່ຈຳເປັນ; ສຳລັບກຳລັງປກຊ-ປກສ ແລະ ເພດ-ໝໍ ແມ່ນໃຫ້ປະຈຳການປົກກະຕິ.

    6. ມອບໃຫ້ ປກຊ-ປກສ ແລະ ຄະນະສະເພາະກິດຂັ້ນເມືອງ ຕັ້ງຈຸດກວດກາຄົນເຂົ້າ-ອອກເມືອງ ແລະ ບ້ານແດງທີ່ມີຄວາມສ່ຽງ ຕະຫຼອດ 24 ຊົ່ວໂມງ (ຍ້ອນກໍລະນີຜູ້ຕິດເຊື້ອໃໝ່ ມີການພົວພັນກັບຄົນຈຳນວນຫຼາຍ),ສຳລັບປະຊາຊົນ, ພົນລະເມືອລາວ ທີ່ມີຈຸດປະສົງເດີ່ນທາງຜ່ານເສັ້ນທາງ ເລກທີ 11 ຜ່ານເມືອງສັງທອງ ແມ່ນ
    ສາມາດຜ່ານໄດ້ (ແຕ່ບໍ່ອະນຸຍາດໃຫ້ຈອດແວ່ຕາມເສັ້ນທາງຂອບເຂດເມືອງສັງທອງ ຢ່າງເດັດຂາດ).7. ມອບໃຫ້ຫ້ອງການສາທາລະນະສຸກ ສົມທົບກັບ ຄະນະສະເພາະກິດຂັ້ນເມືອງ ຊອກຄົ້ນຫາຜູ້ສຳພັດໃກ້ສິດກັບຜູ້ຕິດເຊື້ອ ເພື່ອເກັບຕົວຢ່າງກວດຫາເຊື້ອ ແລະ ນຳເຂົ້າສູນກັກກັນ ຕາມລະບຽບການ.

    8. ມອບໃຫ້ຫ້ອງການ ສຶກສາທິການ ແລະ ກິລາເມືອງ ນຳເອົານັກຮຽນຊັ້ນ ມ 7 ແລະ ຄູ-ອາຈານ ທີ່ສູນສອບເສັງ ມສ ນ້ຳສັງ (ທີ່ພົວພັນກັບທ້າວ ຈິນດາ ເຊິ່ງເປັນສະມາຊິກຄອບຄົວຂອງຜູ້ຕິດເຊື້ອຢູ່ບ້ານສຳພັນນາ) ເພື່ອເກັບ ຕົວຢ່າງກວດຫາເຊື້ອ ແລະ ນຳເຂົ້າສູນກັກກັນ ຕາມລະບຽບການ; ສຳລັບນັກຮຽນ-ຄູອາຈານ ແລະ ຄອບຄົວ
    ສູນສອບເສັງ ມສ ນ້ຳສັງ ທີ່ບໍ່ໄດ້ພົວພັນກັບທ້າວ ຈິນດາ ແມ່ນໃຫ້ປະຕິບັດມາດຕະການກັກບໍລິເວນຕົນເອງຢູ່ພາຍໃນເຮືອນເພື່ອຕິດຕາມອາການ 14 ວັນ ປະຕິບັດມາດຕະການຢ່າງເຂັ້ມງວດ.9. ມອບໃຫ້ຄະນະປະຈຳ, ຄະນະພັກ, ກຳລັງ ປກຊ-ປກສ, ຫົວໜ້າຫ້ອງການອ້ອມຂ້າງ, ຄະນະສະເພາະກິດຂັ້ນເມືອງ, ເລຂາພັກບ້ານ-ນາຍບ້ານ ຈັດຕັ້ງປະຕິບັດ ແຈ້ງການ ສະບັບນີ້ຢ່າງເດັດຂາດ ແລະ ເຂັ້ມງວດ.10. ສໍາລັບຈຸດກວດກາຄົນເຂົ້າ-ອອກເມືອງ ແມ່ນໃຫ້ເພີ່ມມາດຕະການຢ່າງເຂັ້ມງວດ; ສ່ວນບ້ານ ສຳພັນນາ ແລະ​ ບ້ານແກ້ງໝໍ້ ແມ່ນໃຫ້ຕັ້ງຈຸດກວດບ້ານຂອງຕົນເອງ.

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.