ຈຳປາສັກກຽມຂະຫຍາຍໂຮງໝໍພາກສະໜາມອີກ 2 ແຫ່ງຮອງຮັບຜູ້ປ່ວຍໂຄວິດ

    0
    141

    ຄືດັ່ງທີ່ໄດ້ລາຍງານຂ່າວໄປກ່ອນໜ້ານີ້ ແຂວງຈຳປາສັກ ແມ່ນພົບຜູ້ຕິດເຊື້ອໂຄວິດ-19 ເພີ່ມຂຶ້ນທຸກວັນ ຕອນນີ້ແມ່ນບໍ່ມີຕຽງພໍທີ່ຈະຮອງຮັບຜູ້ປ່ວຍອີກແລ້ວ ແຕ່ໃນເວລາດຽວກັນແຮງງານທີ່ກັບມາແຕ່ໄທຍັງຫຼັ່ງໄຫຼມາທຸກມື້ເຊັ່ນດຽວກັນ ຖ້າບໍມາຢູ່ໄທຍັງຈະລຳບາກກວ່າ ສະເພາະເພື່ອກຽມພ້ອມຮັບຜູ້ປ່ວຍໂຄວິດເຂົ້າປິ່ນປົວຕື່ມໃນສະເພາະໜ້າ ແຂວງຕອນນີ້ກຳລັງກຽມຂະຫຍາຍໂຮງໝໍພາກສະໜາມ​ 2​ ແຫ່ງ​.

    ອີງຕາມຂ່າວສານປະເທດລາວ ລາຍງານວ່າ: ທ່ານ ໂສມ ບຸດຕະກຸນ ຮອງເຈົ້າແຂວງຈຳປາສັກ, ທັງເປັນຜູ້ປະຈຳການ ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂ ພະຍາດໂຄວິດ-19 ຂັ້ນແຂວງ ໄດ້ໃຫ້ສຳພາດ ໃນວັນທີ 7 ກໍລະກົດ 2021 ນີ້ວ່າ: ປັດຈຸບັນ, ແຂວງຈຳປາສັກ ກຽມຂະຫຍາຍໂຮງໝໍພາກສະໜາມ ຕື່ມອີກ 2 ແຫ່ງ ເພື່ອຮອງຮັບຄົນເຈັບທີ່ຕິດເຊື້ອໂຄວິດ-19 ຢູ່ໂຮງໝໍ 106 ແລະ ວິທະຍາໄລການເງິນພາກໃຕ້ ເນື່ອງຈາກຈຳນວນຜູ້ຕິດເຊື້ອໂຄວິດ-19 ຢູ່ພາຍໃນແຂວງມີຈຳນວນເພີ່ມຂຶ້ນ, ເຊິ່ງນັບແຕ່ຕົ້ນປີ 2021 ຫາ ວັນທີ 7 ກໍລະກົດ 2021 ມີຜູ້ຕິດເຊື້ອທັງໝົດ 571 ຄົນ, ຍິງ 273 ຄົນ (ຕິດເຊື້ອໃນຊຸມຊົນ 118 ຄົນ ແລະ ຕິດເຊື້ອນໍາເຂົ້າຈາກແຮງງານກັບມາແຕ່ປະເທດເພື່ອນບ້ານ 453 ຄົນ), ໃນນັ້ນ ມີຜູ້ຕິດເຊື້ອຕ່າງແຂວງ 190 ຄົນ ປະກອບມີ: ສາລະວັນ 154 ຄົນ, ສະຫວັນນະເຂດ 18 ຄົນ, ນະຄອນຫລວງ 9 ຄົນ, ຄໍາມ່ວນ 6 ຄົນ, ບໍລິຄໍາໄຊ, ເຊກອງ ແລະ ແຂວງວຽງຈັນ ແຂວງລະ 1 ຄົນ. ມາຮອດປັດຈຸບັນ, ປິ່ນປົວຫາຍດີສະສົມ 371 ຄົນ, ຍັງສືບຕໍ່ປິ່ນປົວຈໍານວນ 200 ຄົນ ຢູ່ສູນປິ່ນປົວເມືອງໂພນທອງ ແລະ ໂຮງໝໍພາກສະໜາມຫລັກ 21.


    ທ່ານ ໂສມ ບຸດຕະກຸນ ໃຫ້ຮູ້ຕື່ມວ່າ: ແຮງງານລາວທີ່ເຂົ້າມາ ຜ່ານດ່ານສາກົນວັງເຕົ່າ-ຊ່ອງເມັກ ສະສົມປີ 2021 ຮອດປັດຈຸບັນ ມີທັງໝົດ 11.090 ຄົນ ໃນນັ້ນ ຈໍາປາສັກ 7.044 ຕ່າງແຂວງ 4.046 ຄົນ. ສໍາລັບແຮງງານທີ່ເຂົ້າມາຈໍາກັດບໍລິເວນທີ່ສູນຫລັກ 21 ປະຈຸບັນມີ 1.020 ຄົນ, ຍິງ 432 ຄົນ.
    ໃນຂະນະດຽວກັນ, ທ່ານ ດຣ ລັດສະໝີ ສີພັນ ຫົວໜ້າຂະແໜງຄວບຄຸມພະຍາດຕິດຕໍ່ ແຂວງຈຳປາສັກ ໄດ້ກ່າວວ່າ: ປັດຈຸບັນ, ແຮງງານລາວທີ່ເຂົ້າມາຢູ່ສູນກັກກັນມີຈຳນວນຫລາຍ ມື້ໜຶ່ງມີເຖິງ 100 ຫາ 200 ຄົນ ເຮັດໃຫ້ພວກເຮົາມີຄວາມຫຍຸ້ງຍາກຫລາຍ ເນື່ອງຈາກສະຖານທີ່ຮອງຮັບບໍ່ພຽງພໍ, ເຄື່ອງອຸປະໂພກ ແລະ ເຄື່ອງໃຊ້ຕ່າງໆທີ່ຈຳເປັນກໍບໍ່ພຽງພໍ ເປັນຕົ້ນ ສາດ, ໝອນ, ມຸ້ງ, ນ້ຳຢາຂ້າເຊື້ອ, ສະບູ ແລະ ອື່ນໆ. ສໍາລັບ ຢູ່ສູນປິ່ນປົວ 2 ແຫ່ງ ທີ່ປິ່ນປົວຜູ້ທີ່ມີອາການເບົາບາງ ຫາຮ້າຍແຮງ ກໍພົບຄວາມຫຍຸ້ງຍາກຄືກັນ ເພາະວ່າຈຳນວນຜູ້ຕິດເຊື້ອກໍມີທ່າອ່ຽງເພີ່ມຂຶ້ນ ເຮັດໃຫ້ສູນປິ່ນປົວດັ່ງກ່າວເຕັມ.

    ສະນັ້ນ, ພວກເຮົາຈຳເປັນຕ້ອງໄດ້ຂະຫຍາຍ ໂຮງໝໍພາກສະໜາມເພີ່ມຕື່ມ ເພື່ອຮອງຮັບຄົນເຈັບທີ່ຕິດເຊື້ອໃໝ່, ແຕ່ກໍຍັງມີຄວາມຕ້ອງການ ສາດ, ໝອນ, ມຸ້ງ ແລະ ອຸປະ ກອນຮັບໃຊ້ທີ່ຈຳເປັນຕ່າງໆ ເພື່ອຮັບໃຊ້ຢູ່ໃນໂຮງໝໍພາກສະໜາມດັ່ງກ່າວ.
    ຂ່າວ: ມະນີທອນ,​ ຂປລ

    LEAVE A REPLY

    Please enter your comment!
    Please enter your name here

    This site uses Akismet to reduce spam. Learn how your comment data is processed.